Niccolò Bacigalupo

Nicolò (o Niccolò) Bacigalupo (1837 – 1904), poeta e drammaturgo italiano.

Incipit di alcune opere

Eneide: ricordi di un reduce troiano in dialetto genovese

Appenn-a han visto Enea tiâ sciû ö mandillo
Sciûsciase ö naso e mettise a scraccâ,
Tutti han çercôu dove pösâ ö bacillo,
Pe sentilo ciû comodi a parlâ.
Quando l'é stæto ognûn quieto e tranquillo
Che se pûeiva sentî ûnn-a mosca sghæuâ,
Enea, dall'äto dö so caregon
Ö commensa, c'ûn pö de commozion:
Mi nö fasso pe dî, bèlla reginn-a,
Ma se parlo, mi ö fasso pe vosciâ
Quando penso ai mæ caxi, ä mæ rovinn-a,
A morte de Creûsa e dö pappâ,
Mi ghe confesso che n'ho a mussa pinn-a
Sciâ scûse l'esprescion, ma chi a ghe stâ,
E invece de contâ di avvenimenti
Mi tieivo zû di tacchi e di aççidenti.

Ö pappagallo de moneghe

No voendo fâme ûn merito de penne do pavon,
Mi creddo necessaio de fâ ûnn-a confescion:
Ö fondo de sto comico racconto, ö mæ ö no l'é:
Ma do Vert-Vert, do classico poemetto de Gresset.
Mì, dell'idea servindome, ö fæto ho ûn pö ingrandïo.
Gh'ho azzunto di accessori, gh'ho dæto ûn atro gïo;
Forse l'ho reizo anemico, avendolo allungôu,
Çerto, che no m'immagino d'aveilo migliorôu;
Oltre che a frase e ö spirito do classico françeize
No l'é çerto poscibile de rendilo in zeneize,
Bezêugna avei da mutria, pe ûn aze comme mì,
De mettise a fâ a scimmia a quella gente lì.